nasin pi kama lape.txt

tenpo mute la, jan li ken ala lape lon tenpo pimeja. ni li ken tan suno anu telo wawa anu toki insa mute anu nasa lawa taso. suno la, o lukin ala e ilo sona lon tenpo lape. ken la o len e lukin sina. telo wawa la, o moku ala e ona. taso ken la sina awen ken ala lape. (anu la, ken la sina lape ala lon tenpo ni a la, ike li kama.) nasin lape mute li lon.
toki insa la, nasin pi sona pi jan mute li ni: o sitelen insa e soweli. ona o tawa lon sewi pi sinpin pake. o nanpa e ona. jan li nanpa la, ona li ken ala toki insa e ijo ante, li ken lape. mi sona ala e ni: ni li pali pona lon lon, anu lon sitelen tawa taso.
kin la, jan li ken sitelen insa e tenpo suno ni kepeken nasin jasima. o sitelen insa e tenpo ni, e tenpo pi weka suno, e tenpo walo, e tenpo pi kama suno. o sona e ijo lili a. lawa o lape tan musi ala.
tenpo la mi lukin e pi nasin ni pi jan utala: o weka e wawa tan sinpin sina. o weka e ona tan sewi luka wan, tan sewi luka ante. o pali e ni tawa wan sijelo ale. o moku e kon kepeken tenpo mute. kama la, o weka e toki insa lon tenpo lili. o sitelen insa e ma pona pi pali ala. pini la, o toki insa mute e ijo wan. ona li ken "tenpo lape li lon" anu "o toki insa ala" anu "kijetesantakalu" anu ante. sona mi la, jan li pali e ni lon tenpo suno mute la, ona li ken lape kepeken ni kepeken tenpo lili a!
nasa la, jan pali mute tawa lape la, pali ona li pake e lape. ni la, o pali wawa ala. o pali e ijo ante. lape li kama lon tenpo kama. kin la, nasin ni li ken: o wile lape ala! ni li nasa lukin a, taso jan mute li toki e ni: ona li pali pona!
ken la, jan li wile ala lape tan ni: ona li weka e tenpo. o sona e ni: jan li lawa e sitelen lape ona la, ona li ken musi mute lon ona, li ken pona e lawa ona. taso nasin seme la jan li ken lawa e sitelen lape ona? tenpo pini la mi pali e mute. mi toki insa mute e ni lon tenpo lape: "mi lawa e lape ni". mi sitelen e sitelen lape mi lon lipu ilo tawa sona pona ona. tenpo la, mi alasa lape ala. ni la, sijelo mi en lawa mi li lape, taso mi lape ala, li ken lawa e sitelen lape. taso tenpo ala la mi lawa e ona. ken la tenpo kama la mi alasa sin. mi wile soweli a!