jan li ken ante e nimi ona.txt

jan mute li jo e nimi wan lon tenpo ale ona. taso jan li ken ante e ona. jan tonsi mute li pali e ni tan ni: nimi mute li toki e kule kon. mama ona li sona ala e kule kon, li pana e nimi ike. taso jan ante kin li ken ante e nimi. ken la nimi ona li jaki anu musi. ken la ona li wile musi e nimi ona a. ken la jan mute li jo e nimi ona. ni li lon la, ona li kute e nimi ona la, ken la jan toki li toki tawa ala ona, tawa jan ante. ken la jan ala li kepeken nimi ni. ken la nimi linluwi ona li nimi lon ona tawa pilin. ante la, jan li kama lon tu olin la, nasin la nimi nanpa tu pi ona tu li kama sama. (nasin la, nimi meli li kama nimi mije.) 
lawa pi ma Inli la, jan mute li kepeken nimi tawa jan la, ona li nimi ona, li ken kama nimi ona lon lawa. taso lawa pi ma Mewika la, jan o toki tawa jan lawa, o jo e ken tan ona, o pana e lipu pi ken ni tawa jan ante tawa ni: ona li ante e lipu jan ona. lawa pi ma ante la, ante li ken.
ilo linluwi mute li pana ala e ken pona pi ante nimi. ken la jan li ken ante e ona kepeken ilo toki kalama taso anu kepeken nasin Imeje taso. ken la ona li wile e lipu lawa pi ante nimi. ken la jan li ken ala ante e ona, li ken kama jo taso e sijelo ilo sin. tenpo mute la, nimi li lon nimi ilo Imele. ken la jan li ken ante ala e ona tan ni: ilo la, sona ale pi jan ni li lon anpa pi nimi ni. kin la, nimi ilo ante li ken ken ala ante. ilo mani la, nasa nimi li lon la, ilo li pilin e ni: pana powe li lon.
nasa li kama mute lon ni: jan li weka e nimi nanpa tu, li jo e nimi wan taso. ilo li pilin e ni: ni li powe. kin la jan mute li pilin e ni: ni li powe. taso ni li powe ala, li lon a. jan Saje li jo e nimi wan taso. ona li ante e nimi ona tan ni: jan ala li kepeken nimi mama ona. ilo li wile e nimi tu la, tenpo mute la nimi nanpa tu li ken sitelen lili taso. kin la, ona li ken pana e nimi sama lon poki nimi tu.
toki pona kin la, jan li ken kepeken nimi wan taso. jan mute li kepeken nimi lawa kan nimi namako. "jan Sonja" la, "jan" li nimi lawa. (ona li ken "jan" ala, sama "kala Asi".) "Sonja" li nimi namako. taso "asali" la, nimi wan taso li lon. kin la, jan li ken kepeken sitelen open lili lon nimi namako ona ("soweli nata"), anu kepeken sitelen lawa mute ("palisa jelo Natan"), anu kepeken kalama pakala ("kala pona Tonyu").
nasa ni li ken tan ni: jan li nasa e nimi linluwi ona ete nimi lon. jan mute li kepeken toki pona lon linluwi. ni la, nimi jan li nasa lon toki pona. kin la, nimi linluwi li ante lon tenpo mute ete ante pi nimi lon. mi ante e nimi mi pi toki pona lon tenpo tu. tenpo open la ona li "Eko", tan nimi linluwi mi. taso jan Eko (anu ilo Eko lon tenpo ni) li kama lon tenpo pini. ni la, ona li kama "Weko". taso jan Weko li lon kin. ni la, mi kepeken ilo pi nimi sin, li alasa e nimi pona. ken li pana e nimi "Kita" lon tenpo tu. ona li pona tawa mi. ni la, mi kama jan Kita. tenpo ni la mi o ante e ona lon ma ale a.